ಹದಿಹರೆಯದ ಮನಸುಗಳಿಗೆ ಹಾದಿ ತೋರಿಸಲು ಪಠ್ಯವೇ ಮಾರ್ಗ

'ಲೈಂಗಿಕ ಶಿಕ್ಷಣ' ಚಿಂತನ ಮಂಥನ

ಲೈಂಗಿಕ ವಿಷಯಗಳ ಬಗ್ಗೆ ಮುಜಗರವಿಲ್ಲದೆ ಮಾತಾಡುವುದು ಕಷ್ಟ. ಈ ವಿಷಯದಲ್ಲಿ ಪೋಷಕರು, ಪಾಲಕರು ಮತ್ತು ಶಿಕ್ಷಕರ ಲಿಂಗ, ಲೈಂಗಿಕ ಸ್ವಭಾವಗಳೂ ಸಹ ಕಲಿಯುವ ಮಕ್ಕಳ ಮನಸ್ಸಿನ ಮೇಲೆ ಹಿಡಿತ ಹೊಂದಿರುತ್ತವೆ. ಆದುದರಿಂದಲೇ ಈ ಮನೋಭಾವ ಬದಲಾಗುವ ಅಗತ್ಯವಿದೆ.
ಮಗುವಿಗೆ ತನ್ನ ಶರೀರ ಮತ್ತು ಮನಸ್ಸಿನ ವಿಕಾಸದ ಕ್ರಮವು ಸ್ಪಷ್ಟವಾಗಿ ಅರ್ಥವಾಗದಿದ್ದರೂ ಶರೀರ ಮತ್ತು ಮನಸ್ಸಿನೊಳಗಾಗುವ ಬದಲಾವಣೆಗಳ ಅನುಭವನ್ನು ತಪ್ಪಿಸಿಕೊಳ್ಳುವುದು ಸುಲಭವಲ್ಲ. ಸಣ್ಣ ತರಗತಿಯ ಮಟ್ಟದಿಂದಲೇ ಜೀವಶಾಸ್ತ್ರದ ಪಠ್ಯಕ್ರಮದಲ್ಲಿರುವುದುಂಟು. ಬೋಧನೆಯ ಕ್ರಮದಲ್ಲಿ ಶರೀರದ ಅಂಗಾಂಗಳ ಕಾರ್ಯಾಚರಣೆ, ಅವುಗಳ ಸುಗಮ ಕಾರ್ಯಾವಿಧಾನಕ್ಕೆ ಬೇಕಾಗಿರುವ ಸ್ಥಿತಿಗತಿಗಳನ್ನು ಸಹ ಮಕ್ಕಳು ಒಂದಲ್ಲಾ ಒಂದು ಹಂತದಲ್ಲಿ ಪರಿಚಯ ಮಾಡಿಕೊಳ್ಳುತ್ತಾರೆ . ಹಂತ ಹಂತವಾಗಿ ಪರಿಚಯವಾಗುವ ಈ ಕ್ರಮದಲ್ಲಿ ಜನನ ಕ್ರಿಯೆಗಳ ಬಗ್ಗೆಯೂ ಮಾಹಿತಿ ಇರುತ್ತದೆ. ಆದರೆ ಶರೀರದ ಮಟ್ಟದಲ್ಲಿ ಅನುಭವವಾಗುವ ಲೈಂಗಿಕತೆಯೂ ಮಾನಸಿಕ, ಸಾಮಾಜಿಕ ಪ್ರಭಾವಗಳಿಗೂ ಒಳಪಟ್ಟಿರುವಂಥದ್ದೇ ಆಗಿರುತ್ತದೆ ಎನ್ನುವುದರ ಬಗ್ಗೆ ವಿವರಿಸುವುದು ಬಹತೇಕ ಶಿಕ್ಷಕರು ಮತ್ತು ಪೋಷಕರಿಗೂ ಮುಜುಗರದ ಸಂಗತಿ. ಲೈಂಗಿಕ ಪ್ರಚೋದನೆಗಳಿಂದ ಹೊರಬರುವ ವರ್ತನೆಗಳು ಅವಷ್ಟಕ್ಕೆ ಅವು ಇದ್ದುಬಿಡುತ್ತವೆ, ಬದಲಾಗುವುದಿಲ್ಲವೆನ್ನುವುದು ಇಂದಿನ ಮಕ್ಕಳ ವರ್ತನೆಗಳನ್ನು ನೋಡಿದಾಗ ಅರ್ಥವಾಗುತ್ತದೆ. ಕಾಮದ ಕಂಪನಗಳು ಮಕ್ಕಳ(ವ್ಯಕ್ತಿ) ಮನಸ್ಸು ಮತ್ತು ವರ್ತನೆಗಳನ್ನು ಸಂಪೂರ್ಣವಾಗಿ ಹತೋಟಿಯಲ್ಲಿರಿಸಿಕೊಳ್ಳುವ ಬಲವನ್ನು ಹೊಂದಿರುತ್ತವೆ. ಕಂಪನಗಳು ಗೋಪ್ಯತೆ, ಆಕ್ರೋಶ, ತಳಮಳಗಳನ್ನು ಸಹ ಹುಟ್ಟಿಸಬಲ್ಲವು. ಉದಾಹರಣೆಗೆ, ಹಸ್ತ ಮೈಥುನದ ಮೊದಲ ಪ್ರಯತ್ನವು ಹಲವಾರು ವಿಧದ ಸಾಮಾಜಿಕ ವರ್ತನೆಗೆ ಕಾರಣವಾಗಬಲ್ಲದು. ಬಹುತೇಕ ಮಕ್ಕಳು ಇದನ್ನು ಅನುಭವಿಸಿದರೂ ಆ ಪ್ರಕ್ರಿಯೆ ಹೊರತರುವಂಥ ವರ್ತನೆ ಎಲ್ಲ ಮಕ್ಕಳಲ್ಲೂ ಒಂದೇ ರೀತಿಯಲ್ಲಿ ಇರದು. ಇದರಿಂದುಂಟಾಗುವ ಆತಂಕ, ಕಳವಳ, ಅಸಹಾಯಕತೆಯಂತಹ ಮಾನಸಿಕ ಸ್ಥಿತಿಗಳು ಮಿಕ್ಕೆಲ್ಲ ವರ್ತನೆಗಳನ್ನು ಅಧೀನದಲ್ಲಿರಿಸಿಕೊಳ್ಳದಿರುವುದು ಅಪರೂಪ. ಆದರೆ ಈ ರೀತಿಯ ಸ್ಥಿತಿ ಸಹಜ/ಅಸಹಜವೆನ್ನುವುದನ್ನು ಗುರುತಿಸುವ/ಒಪ್ಪಿಕೊಳ್ಳುವ ಕ್ರಮಗಳೇ ಆರೋಗ್ಯಕರ ಮನೋವಿಕಾಸಕ್ಕೆ ಕಾರಣವಾಗುತ್ತವೆ.
ಲೈಂಗಿಕ ಶಿಕ್ಷಣ ಅಥವಾ ಲೈಂಗಿಕತೆಯ ವಿಕಾಸ: ಇಂತಹ ತಿಳಿವಳಿಕೆಯನ್ನು ವ್ಯವಸ್ಥಿತ ರೀತಿಯಲ್ಲಿ ಪರಿಚಯಿಸಿಕೊಡುವುದಕ್ಕೆ ಸಾಧ್ಯವಿದೆ. ಇದನ್ನು ಲೈಂಗಿಕ ಶಿಕ್ಷಣ ಅಥವಾ ಲೈಂಗಿಕತೆಯ ವಿಕಾಸವೆನ್ನುವ ರೀತಿಯಲ್ಲಿ ಮಕ್ಕಳ ವಯೋವಾನಕ್ಕೆ ಅನುಗುಣವಾಗಿ ಕಲಿಸಿಕೊಡಬಹುದು. ಈ ವಿಷಯದಲ್ಲಿ ಪೋಷಕರು, ಬೋಧಕರು ಮತ್ತು ಶಿಕ್ಷಣ ವ್ಯವಸ್ಥೆಯ ನಡುವೆ ಸಂಘರ್ಷಗಳು ಇದ್ದೇ ಇರುತ್ತವೆ, ನಿಜ. ಆದರೆ ಭವಿಷ್ಯದ ಪ್ರಜೆಗಳಲ್ಲಿ ಮಾನಸಿಕವಾಗಿ ಸದೃಢರಾಗಿರುವುದಕ್ಕೆ ಹಿರಿಯರು ಮತ್ತು ಸರ್ಕಾರಗಳ ಸಹಭಾಗಿತ್ವ ಬಹಳ ಮುಖ್ಯ. ಕುಟುಂಬ ಕಲ್ಯಾಣ, ಮಕ್ಕಳ ವಿಕಾಸಕ್ಕಾಗಿ ಇಲಾಖೆಗಳಿವೆ. ಸಾರ್ವಜನಿಕರ ಮಾನಸಿಕ ಆರೋಗ್ಯವನ್ನು ಕಾಪಾಡುವ ಹೊಣೆಗಾರಿಕೆ ಅವುಗಳದ್ದಾಗಬೇಕು. ಹಾಗೆಂದ ಮಾತ್ರಕ್ಕೇ ಸರ್ಕಾರವೊಂದರಿಂದಲೇ ಮಕ್ಕಳ ಮನೋವಿಕಾಸ ಉತ್ತಮಗೊಳ್ಳಬಲ್ಲದು ಎನ್ನುವುದು ಅರ್ಥವಲ್ಲ. ಜನಸಾಮಾನ್ಯರಲ್ಲಿರಬಹುದಾದ ಪೂರ್ವಗ್ರಹಗಳನ್ನು ಬದಿಸರಿಸುವ ಪ್ರಯತ್ನ ಅದಾಗಬೇಕು.
ಮನೆಯಲ್ಲಿ ಪೋಷಕರು ಮಕ್ಕಳೊಂದಿಗೆ "ಲೈಂಗಿಕ ಕ್ರಿಯೆಗಳು" ಪಾಪಪ್ರಜ್ಞೆಯ ಚಟುವಟಿಕೆ ಎನ್ನುವ ರೀತಿಯಲ್ಲಿ  ಮಾತಾಡುವುದು ಸಾಮಾನ್ಯ. ಆದರೆ ಇಂತಹ ಭಾವಗಳನ್ನು ದೂರ ಸರಿಸಿದಾಗ ಮಾತ್ರ ಮಕ್ಕಳಲ್ಲಿ ಲೈಂಗಿಕ ವಿಷಯಗಳು ಹುಟ್ಟಿಸುವ ತೀವ್ರ ಕುತೂಹಲ ಮತ್ತು ಮುಜುಗರ ಬದಲಾಗಬಹುದು. ಅಲ್ಲದೇ ಇದರಿಂದಾಗಿ ಪೋಷಕರ ಮನದಾಳದಲ್ಲಿ ಬೀಡುಬಿಟ್ಟಿರುವ ಅವರ ಬಾಲ್ಯದ ವಿಚಾರಧಾರೆಗಳು, ಕಟ್ಟಪಾಡುಗಳನ್ನು ಬದಲಾಯಿಸಿ, ಹೊಸ ತಿಳಿವಳಿಕೆಯನ್ನು ಮೂಡಿಸಬಲ್ಲದು. ಹೀಗೇನಾದರೂ ಬದಲಾವಣೆಗಳು ಆದರೆ ಕಾಮದ ಬಗ್ಗೆ ಹುಟ್ಟಿಕೊಳ್ಳುವ  ಹಲವಾರು ತಪ್ಪುಗ್ರಹಿಕೆಗಳನ್ನು ತಡೆಗಟ್ಟುವುದಕ್ಕೆ/ ಬದಲಾಯಿಸುವುದಕ್ಕೆ ಸಾಧ್ಯವಿದೆ. ಇದು ಇಡೀ ಕುಟುಂಬದ ಮಾನಸಿಕ ಆರೋಗ್ಯದ ರಕ್ಷಣೆಯನ್ನು ಮಾಡಬಲ್ಲ ಪ್ರಯತ್ನವೆನ್ನುವುದನ್ನು ಮರೆಯಬಾರದು.
ಮಕ್ಕಳ ಮನಸ್ಸಿನ ಬೆಳವಣಿಗೆ, ಬದಲಾವಣೆಗಳ ಬಗ್ಗೆ ಅಧ್ಯಯನಗಳನ್ನು ಮಾಡಿರುವ ಅನೇಕರ ಪ್ರಕಾರ ಲೈಂಗಿಕ ವಿಷಯಗಳ ಬಗ್ಗೆ ಮನೆಯ ವಾತಾವರಣದಲ್ಲಿರುವಂತಹ  ಮಜುಗರ, ಮಡಿವಂತಿಕೆಯ ಭಾವನೆಗಳು ಮಕ್ಕಳ ಮನದಲ್ಲಿ ಮೂಡುವ ಲೈಂಗಿಕ ವಿಷಯದ ಬಗೆಗಿನ ಕುತೂಹಲವನ್ನೇನು ಕ್ಷೀಣಿಸುವುದಿಲ್ಲ. ಬದಲಿಗೆ ಕಾಮದ ವಿಷಯಗಳ ಬಗ್ಗೆ ಮುಚ್ಚುಮರೆಯ ವರ್ತನೆಗಳು ಗಟ್ಟಿಯಾಗುವಂತೆ ಮಾಡುತ್ತವೆ. ಇದು ನಂತರದ ದಿನಗಳಲ್ಲಿ ವ್ಯಕ್ತಿತ್ವದ ಗೊಂದಲಕ್ಕೂ ಕಾರಣವಾಬಲ್ಲದು. ಮನೆಯಲ್ಲಿರುವ ಹಿರಿಯರು, ಪೋಷಕರು ಲೈಂಗಿಕ ವಿಷಯಗಳ ಬಗ್ಗೆ ಸಮರ್ಪಕವೆನ್ನುವಂಥ ಅರಿವನ್ನು ಮಕ್ಕಳಲ್ಲಿ ಮೂಡಿಸದಿದ್ದಾಗ ಹೊರಗಿನವರಿಂದ, ಅದರಲ್ಲಿಯೂ ವಿಶೇಷವಾಗಿ, ಸಮವಯಸ್ಕರು, ಗೆಳೆಯರ ಮೂಲಕ ಮಕ್ಕಳು ಮಾಹಿತಿ ಪಡೆಯುತ್ತಾರೆ. ಮನಸ್ಸಿಗೆ ಹಿತವಾಗುವಂತಹ ವಿಷಯಗಳನ್ನೇ ಗೆಳೆಯರು ಒದಗಿಸುತ್ತಾರೆ!
ಮಕ್ಕಳು, ಹೆಣ್ಣು, ಗಂಡು ಎನ್ನುವ ವ್ಯತ್ಯಾಸವಿಲ್ಲದೆ ಶರೀರದ ಕೆಲ ಭಾಗ ಅಥವಾ ಅಂಗಾಂಗಳು ವಿಶೇಷವೆನ್ನುವಂತಹ ಸ್ಪರ್ಶ ಸುಖ ಕೊಡುತ್ತವೆ. ಈ ಲಕ್ಷಣವು ಪ್ರಾಥಮಿಕ ಶಾಲೆಯ ಹಂತದಲ್ಲಿ ಕಾಣಿಸಿಕೊಳ್ಳುವುದರಿಂದ ಮುಟ್ಟುವುದರಿಂದ/ಮುಟ್ಟಿಕೊಳ್ಳುವುದರಿಂದ ಹಿತ ಅನುಭವವಾಗುತ್ತದೆ. ಪ್ರಾಥಮಿಕ ಶಾಲಾ ಅವಧಿಯ ಕೊನೆಯ ಹಂತದಲ್ಲಿ ಕಾಮೋದ್ರೇಕಿಸುವ ಅಂಗಾಂಗಗಳ ಹೆಸರು ತಿಳಿಯದಿದ್ದರೂ ಅವುಗಳಿಂದ ಕಾಮ ಕಂಪನ ಮತ್ತು ತೃಪ್ತಿ ಸಾಧ್ಯವೆನ್ನುವುದು ಮಕ್ಕಳಿಗೆ ಗೊತ್ತಾಗುತ್ತದೆ. ಕಾಮಾಂಗಗಳು ಇತರೆ ಕಾರ್ಯಗಳನ್ನು ಮಾಡಬಲ್ಲವು ಎನ್ನುವುದು ಮಹತ್ವವನ್ನು ಪಡೆಯುವುದಿಲ್ಲ. ಮಲ ಮೂತ್ರ ವಿಸರ್ಜನೆಯ ಕ್ರಿಯೆಗಳ ಬಗ್ಗೆ ತಿಳಿವಳಿಕೆ ಇದ್ದರೂ ಸಹ ಕಾಮೋದ್ರೇಕದ ವಿವಿಧ ಹಂತಗಳು, ಪ್ರಚೋದನೆಗಳು ಮಕ್ಕಳ ಮನಸ್ಸಿಗೆ ಗೊಂದಲದ ವಿಷಯವಾಗಿಯೇ ಉಳಿಯುತ್ತವೆ. ಈ ಸ್ಥಿತಿಯನ್ನು ತಿಳಿಗೊಳಿಸುವ ಕಾರ್ಯದಲ್ಲಿ ಲೈಂಗಿಕ ವಿಷಯಗಳ ಪ್ರಸ್ತಾವನೆ ಸೂಕ್ತ ರೀತಿಯಲ್ಲಿ ಮಾಡುವುದರಿಂದ ಹಾನಿಯೇನೂ ಆಗುವುದಿಲ್ಲ ಎನ್ನುವುದನ್ನು ಲೈಂಗಿಕ ತಜ್ಞರು ಮೇಲಿಂದ ಮೇಲೆ ಹೇಳುತ್ತಲೇ ಇದ್ದಾರೆ. ವ್ಯವಸ್ಥಿತ ರೀತಿಯಲ್ಲಿ ಲೈಂಗಿಕ ವಿಷಯಗಳ ಬಗ್ಗೆ ತಿಳಿವಳಿಕೆ ಕೊಡಿಸುವ ಕಾರ್ಯವನ್ನು ಮನೆ ಮತ್ತು ಶಾಲೆ ಪರಿಣಾಮಕಾರಿಯಾಗಿ ಮಾಡಬಲ್ಲವು.
ಮಕ್ಕಳ ಮಾನಸಿಕ ವಿಕಾಸ ಹಂತಹಂತವಾಗಿ ಆಗುವಂತಹ ಪ್ರಕ್ರಿಯೆ. ಈ ಪ್ರಕ್ರಿಯೆಯಲ್ಲಿ ವ್ಯಕ್ತಿ, ಪರಿಸರ ಮತ್ತು ಶರೀರದ ಕ್ರಿಯೆಗಳು ಭಾಗಿಯಾಗಿರುತ್ತವೆ. ಮನೆಯ ವಾತಾವರಣ, ಕುಟುಂಬ ಮತ್ತು ಸಮುದಾಯದ ಕಟ್ಟುಪಾಡುಗಳಿಗೆ ಸದಾ ಸಕಾರಾತ್ಮಕವಾಗಿ ಸ್ಪಂದಿಸುವುದು ಎಂದು ಹೇಳುವುದು ಕಷ್ಟ. ಈ ಹಿನ್ನೆಲೆಯಲ್ಲಿ ಲೈಂಗಿಕತೆ ಮತ್ತು ಕಾಮೋದ್ರೇಕದ ರೀತಿ/ಅನುಭವಗಳು ಸ್ವಭಾವಗಳಿಗೆ ಉಳಿದುಕೊಳ್ಳುವ ಸಾಧ್ಯತೆಗಳು ಹೆಚ್ಚು. ಮನೆಯ ವಾತಾವರಣದಲ್ಲಿ ಕಾಮೋದ್ರೇಕದ ವಿಷಯಗಳನ್ನು ಮರೆಮಾಚುವುದರಿಂದ ಲೈಂಗಿಕ ಸಭ್ಯತೆ ಮತ್ತು ಸಂಯಮ ಗಟ್ಟಿಯಾಗುವುದಿಲ್ಲ ಎನ್ನುವುದೇ ತಜ್ಞರ ಅಭಿಮತ. ಮಕ್ಕಳು ತಮ್ಮ ಶರೀರ ಮತ್ತು ಮನಸ್ಸಿನಲ್ಲಾಗುವ ಬದಲಾವಣೆಗಳ ಬಗ್ಗೆ ತಿಳಿದುಕೊಳ್ಳುವ ಕುತೂಹಲವೇ ಅದೆಷ್ಟೋ ಸಲ ಅಹಿತಕರ ಅನುಭವಗಳಿಗೆ ಸಿಕ್ಕಿಕೊಳ್ಳುವಂತೆ ಮಾಡುತ್ತದೆ. ದುಷ್ಟ/ಕಾಮುಕ ವಯಸ್ಕರು ಇಂತಹದೊಂದು ಸನ್ನಿವೇಶಕ್ಕಾಗಿ ಕಾಯುತ್ತಿರುತ್ತಾರೆ. ಹಾಗೆ ನೋಡಿದರೆ ಲೈಂಗಿಕ ದುಷ್ಟತನ ಹುಟ್ಟುವುದಕ್ಕೂ ಅರಿವಿನ ಕೊರತೆಯೇ ಕಾರಣವಾಗಿರುವುದು ಸಾಮಾನ್ಯ.
ಹೊಸ ಜಗತ್ತಿನೊಂದಿಗೆ ಕಲಿಕೆಯೂ ಸಾಗಬೇಕು: ನಾವಿರುವ ಜಗತ್ತು ಕಲಿಕೆ, ಹೊಸತನಗಳನ್ನೇ ಉತ್ತೇಜಿಸುವ ವಾತಾವರಣವನ್ನು ಉತ್ತೇಜಿಸುತ್ತದೆ. ಇದು ಬಯಕೆಯಾಗಿಯೂ ವ್ಯಕ್ತಿಯ ಮನಸ್ಸಿನ ಮೇಲೆ ಹತೊಟಿಯನ್ನು ಪಡೆಯಬಲ್ಲದು. ಆಧುನಿಕ ತಂತ್ರಜ್ಞಾನ ವ್ಯಕ್ತಿತ್ವ ಮತ್ತು ಸಾಮಾಜಿಕ ನೆಲೆಗಳನ್ನು ಬಹಳ ವೇಗವಾಗಿ ಸ್ವಾಧೀನ ಪಡಿಸಿಕೊಳ್ಳುತ್ತಿದೆ. ಇಂದು ಮಾಹಿತಿಗಳ ಸಂಚಲನ ಕ್ಷಣ ಮಾತ್ರದಲ್ಲಿ ಆಗುತ್ತದೆ. ಸಣ್ಣ ಮಕ್ಕಳಿಗಂತೂ ತಂತ್ರಜ್ಞಾನದ ಮಹತ್ವವೇನೆಂಬುದರ ಅರಿವು ಚೆನ್ನಾಗಿಯೇ ಆಗಿದೆ. ಆತ್ಮವಿಶ್ವಾಸ ಹೆಚ್ಚಿಸುವ ಮತ್ತು ಕುಗ್ಗಿಸುವ ಬಲ ಇದಕ್ಕಿದೆ ಎನ್ನುವುದಕ್ಕೆ ಉದಾಹರಣೆಗಳು ನೂರಾರು ಸಿಗುತ್ತವೆ. ನಗರ ಪ್ರದೇಶಗಳಲ್ಲಿರುವ ಪಬ್ಲಿಕ್ ಸ್ಕೂಲುಗಳ ಉಳ್ಳವರ ಮಕ್ಕಳ ಕೈಲಿರುವ ದುಬಾರಿ ಬೆಲೆಯ ಮೊಬೈಲುಗಳು, ವಿದ್ಯುನ್ಮಾನ ಸಲಕರಣೆಗಳು... ಇವನ್ನು ಪಡೆಯಲಾಗದ ಅದೆಷ್ಟೋ ಮಕ್ಕಳ ಆತ್ಮವಿಶ್ವಾಸಕ್ಕೆ ಹೊಡೆತ ಕೊಡುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಶಾಲೆಯ ಆವರಣವಿಂದು ಅಸಹಾಯಕತೆ, ಅಸೂಯೆಯನ್ನು ಹುಟ್ಟಿಸುವ ತಾಣವೂ ಆಗುತ್ತಿದೆ. ಮಕ್ಕಳ ಮನಸ್ಸಿನ ಅನೇಕ ಗೊಂದಲಗಳ ಮೂಲ ಶಾಲೆಯಾಗುತ್ತಿದೆ ಎನ್ನುವುದು ಪೋಷಕರು, ಪಾಲಕರ ಸಮಸ್ಯೆಯೂ ಹೌದು. ಶಾಲಾ ಪರಿಸರದ ಪ್ರಭಾವ ಎಂತಹದ್ದು ಎನ್ನುವ ತಿಳಿವಳಿಕೆ ಇರುವ ಪೋಷಕರ ಸಂಖ್ಯೆ ಕಡಿಮೆ. ಜೊತೆಗೆ ವಯಸ್ಸಿಗೆ ಮೀರಿದ ಮಾಹಿತಿಗಳು ಮಕ್ಕಳ ಸ್ಮೃತಿಗೆ ಸೇರುತ್ತಿರುವುದು ಸವಾಲಿನ ವಿಷಯವೇ ಸರಿ. ವಿಶೇಷವಾಗಿ  ಸೆಕ್ಸ್ ಮಾಹಿತಿಗಳು. ಇವು ಪ್ರಾಥಮಿಕ ಶಾಲೆಯ ಮಕ್ಕಳ ಗಮನಕ್ಕೆ ಒಂದಲ್ಲಾ ಒಂದು ವಿಧದಲ್ಲಿ ಬಂದೇ ತೀರುತ್ತವೆ. ಹೆಚ್ಚಿನ ಸಮಯದಲ್ಲಿ ಇದು ಭಯ ಮತ್ತು ಕುತೂಹಲಗಳೆರಡನ್ನು ಹುಟ್ಟಿಸುವಂತಹದ್ದೇ ಆಗಿರುತ್ತದೆ. ಕುತೂಹಲ ಮಕ್ಕಳ ಸಹಜ ಸ್ವಭಾವ, ಅದರ ಮೂಲಕವೇ ಪರಿಸರದ ಅರಿವು ಹೆಚ್ಚುವುದು, ಸರಿ-ತಪ್ಪುಗಳ ಆಯ್ಕೆಯೂ ಆಗುವುದು. ಮಕ್ಕಳ ಮನಸ್ಸನ್ನು ತಯಾರಿಸುವ ಕಲೆ ಶಾಲೆಗಳಿಗಿದೆ ಎನ್ನುವ ದೃಢ ವಿಶ್ವಾಸವೇ ಪೋಷಕರ ಈ ನಂಬಿಕೆಗೆ ಕಾರಣ. ಶಾಲೆಯ ಮೂಲಕ ಮಕ್ಕಳ ಮಾನಸಿಕ ವಿಕಾಸ ಸರಳ ಮತ್ತು ಸರಾಗವಾಗಿ ಮುಂದುವರೆಯುತ್ತದೆ ಎನ್ನುವುದರ ಬಗ್ಗೆ ಪೋಷಕರಿಗೆ ಅನುಮಾನ ಇರದು.
ಹೀಗಿದ್ದಾಗ್ಯೂ ಲೈಂಗಿಕ ಬೆಳವಣಿಗೆ, ಬದಲಾವಣೆಗಳ ವಿಷಯಕ್ಕೆ ಬಂದಾಗ ಪೋಷಕರ ಮನಸ್ಸು ಬೇರೆಯೇ ಆಗಿರುತ್ತದೆ. ಅದರಲ್ಲಿಯೂ ಹೆಣ್ಣು ಮಕ್ಕಳ ಶಾರೀರಿಕ ಬೆಳವಣಿಗೆಯ ಕಡೆ ನಿಗಾ, ಕಾಳಜಿ ಮತ್ತು ಆತಂಕ ಹೆಚ್ಚಾಗಿಯೇ ಇರುತ್ತದೆ. ಚಾರಿತ್ರ್ಯದ ಬೆಳವಣಿಗೆಗೆ ಲೈಂಗಿಕ ವಿಷಯಗಳ ಅರಿವು ಬಹಳ ದೊಡ್ದ ಪ್ರಭಾವ ಬೀರುತ್ತದೆ. ಮಕ್ಕಳ ಚಾರಿತ್ರ್ಯದ ಬೆಳವಣಿಗೆ/ಬದಲಾವಣೆಗಳಿಗೂ ಕಾಮದ ಸಂಗತಿಗಳು ಪೂರಕವಾಗಿರುತ್ತವೆ ಎನ್ನುತ್ತಾರೆ ವಿಕಾಸಾತ್ಮಕ ಮನೋವಿಜ್ಞಾನಿಗಳು.
ಗಂಡು-ಹೆಣ್ಣು ನಡುವೆ ಗೆಳೆತನದ ಸಂಬಂಧ ಗಟ್ಟಿಯಾಗುವುದಕ್ಕೂ ಲೈಂಗಿಕ ಜ್ಞಾನ ಬಹಳ ಮುಖ್ಯ. ಈಗಂತೂ ಮೊಬೈಲುಗಳಲ್ಲಿರುವ ಕೆಮೆರಾದ ಕಣ್ಣುಗಳ ಮೂಲಕ ಮನದಾಳದ ವಿಕೃತಿಯನ್ನು ತೀರಿಸಿಕೊಳ್ಳುವುದು ಬಹಳ ಸುಲಭ. ಇದರಿಂದಾಗುತ್ತಿರುವ ಕೆಟ್ಟ ಪರಿಣಾಮಗಳು ಮಾನಸಿಕ ಸಮತೋಲನವನ್ನು ಕೆಡಿಸಿರುವುದೂ ಉಂಟು. ಮಕ್ಕಳ ಮನಸ್ಸಿನಲ್ಲಿ ಅನುರಾಗದ ಭಾವನೆಗಳು ಬಾರದೇ ಇರುವಂತೆ ಮಾಡಲು ಸಾಧ್ಯವಿಲ್ಲ. ಆದರೆ ಮಕ್ಕಳ ಮನಸ್ಸಿಗೆ ಬರುವ ಭಾವನೆಗಳೆಲ್ಲವೂ ಲೈಂಗಿಕ ಉದ್ದೇಶವನ್ನೇ ಹೊಂದಿರಬೇಕು ಎನ್ನುವಂತಹ ಕಲ್ಪನೆ ದೂರ ಮಾಡುವುದಕ್ಕೆ ಶಿಕ್ಷಣ ಬೇಕಾಗುತ್ತದೆ. ಪ್ರೀತಿ, ವಾತ್ಸಲ್ಯಗಳ ಹೆಸರಿನಲ್ಲಿ ಕಾಮೋದ್ರೇಕ ಸಾಧ್ಯವಿದೆ. ಅದನ್ನು ನಿಗ್ರಹಿಸಿಕೊಳ್ಳುವುದಕ್ಕೂ ಅವಕಾಶಗಳಿವೆ ಎನ್ನುವಂತಹ ವಿಷಯ ಮಕ್ಕಳ ಸ್ವಭಾವಗಳಲ್ಲಿ ಒಂದಾಗಿರಬೇಕು.
ಲೈಂಗಿಕ ವಿಷಯಗಳ ಬಗ್ಗೆ ಅಂತರ್ಜಾಲದ ಮೂಲಕ ಲಭ್ಯವಿರುವ ಮಾಹಿತಿಗಳು ಭಯಂಕರವೆಂದರೂ ತಪ್ಪಾಗಲಾರದು. ಕ್ಷಣದಲ್ಲಿ ಸ್ತ್ರೀ-ಪುರುಷರ ಕಾಮಕ್ರಿಯೆಗಳನ್ನು ಯಾವ ಅಡೆತಡೆಗಳಿಲ್ಲದೆಯೇ ವೀಕ್ಷಿಸುವುದಕ್ಕೆ ಅವಕಾಶವಿದೆ. ಹದಿಹರೆಯಕ್ಕೆ ಕಾಲಿಡದ ಬಹುತೇಕ ಮಕ್ಕಳಿಗೆ ಇಂತಹ ವಿಷಯಗಳ ಬಗ್ಗೆ ಸಚಿತ್ರ ಮಾಹಿತಿಗಳು ದೊರಕುತ್ತವೆ. ಅವುಗಳಿಂದ ತಲ್ಲಣಗೊಂಡವರ ವರ್ತನೆಗಳು ಸಹಜವಾಗಿರುವುದಿಲ್ಲವೆನ್ನುವುದೂ ಸಹ ತಿಳಿದ ಸಂಗತಿಯೇ. ಆದರೆ ಇಂತಹ ವಿಷಯಗಳನ್ನು ನಿಭಾಯಿಸುವ ತಿಳಿವಳಿಕೆ ಬಹುತೇಕ ಪೋಷಕರಲ್ಲಿ ಇರುವುದಿಲ್ಲ. ಹೀಗಾಗಿ ಶಾಲೆಯ ಆವರಣದ ಮೂಲಕವೇ ಇವುಗಳನ್ನು ಪರಿಚಯಿಸಿಕೊಡುವ ಅಗತ್ಯವಿದೆ.
ಮೊದಲ ಸಲ ಕಾಮೋದ್ರೇಕಕ್ಕೆ ಒಳಗಾದ ಬಹಳಷ್ಟು ಮಕ್ಕಳು 'ಹಾಗೆ ಮಾಡಬಾರದಿತ್ತು' ಎಂದುಕೊಳ್ಳವುದು ಸಹಜ. ಪಾಪಪ್ರಜ್ಞೆಯಿಂದ ಬಳಲುವ ಮಕ್ಕಳಿಗೆ ಸಾಂತ್ವನ ಮತ್ತು ಸಲಹೆಯ ಅಗತ್ಯವಿರುತ್ತದೆ. ಇದನ್ನು ಒದಗಿಸಿಕೊಡುವ ವಾತಾವರಣ ನಿರ್ಮಾಣವಾಗಬೇಕಿದೆ. ಮತ್ತೆ ಅದೇ ಪ್ರಶ್ನೆ "ಯಾರು, ಎಲ್ಲಿ,  ಹೇಗೆ?" ಎನ್ನುವುದು ಸ್ಪಷ್ಟವಾಗದೇ ನಿಂತಿದೆ. ಇವತ್ತಿಗೂ ಬಹಳಷ್ಟು ಸುಶಿಕ್ಷಿತ ಪೋಷಕರು, ಪಾಲಕರು ಇರುವ ಕುಟುಂಬಗಳಲ್ಲಿಯೂ ಜನನ ಕ್ರಿಯೆಗಳ ಬಗ್ಗೆ ಮಕ್ಕಳಿಗೆ ಮಾಹಿತಿ ಕೊಡುವುದು ಅಪರೂಪ. ಈ ಮಾದರಿಯ ಮೌನ ಮಾನವ ಸಹಜವೆನ್ನುವಷ್ಟರ ಮಟ್ಟದಲ್ಲಿರುವುದು ಸತ್ಯ. ಪೋಷಕರ ಮನಸ್ಸಿನಲ್ಲಿ ಇದು ಮಕ್ಕಳಿಂದ ಮುಚ್ಚಿಡಬೇಕಾದ ವಿಷಯವೆನ್ನುವ ಭಾವನೆ ಇರದಿದ್ದರೂ ಇದರ ಬಗ್ಗೆ ಯಾವ ರೀತಿಯಲ್ಲಿ ಮಕ್ಕಳೊಂದಿಗೆ ಸಂಭಾಷಣೆ ಮಾಡಬೇಕು ಎನ್ನುವುದೇ ಅವರ ಸಮಸ್ಯೆ. ಕಾಮೋದ್ರೇಕದ ವಿಷಯಗಳೂ ಸಹ ಮಕ್ಕಳ ಬಾಯಿಯಲ್ಲಿ ಸರಾಗವಾದ ಪ್ರಶ್ನೆಗಳ ರೀತಿಯಲ್ಲಿ ಮೂಡಿಬರುತ್ತವೆ. ಉತ್ತರ ಸೂಕ್ತವಾಗಿರದಿದ್ದಲ್ಲಿ(ಹೆಚ್ಚಿನ ಸಮಯದಲ್ಲಿ ಸೂಕ್ತವಾಗಿರುವುದಿಲ್ಲ) ಅವರ ಅನುಮಾನಗಳು ಭಯದ ಮನಸ್ಥಿತಿ ಹುಟ್ಟಿಕೊಳ್ಳುವುಂತೆ ಮಾಡಬಲ್ಲದು. ಚಲನಚಿತ್ರಗಳು ಸಹ ಮಕ್ಕಳ ಲೈಂಗಿಕ ಸ್ವಭಾವಗಳನ್ನು ಗಟ್ಟಿಮಾಡುವುದರಲ್ಲಿ ಹಿಂದೆ ಬಿದ್ದಿಲ್ಲ. ರಮಣೀಯ ದೃಶ್ಯಗಳು ನಡುವೆ ಕಾಮೋದ್ರೇಕ ಹೆಚ್ಚು ಎಂಬುದನ್ನು ತಿಳಿಯದಿರುವ ಮಕ್ಕಳು ಅಪರೂಪ. ಹಾಗೆಯೇ ಚಿತ್ರದ ಪ್ರಮುಖ ಪಾತ್ರಧಾರಿಗಳ ಹಾವ ಭಾವ, ವೇಷಭೂಷಣಗಳು ಮಕ್ಕಳ ಮನಸ್ಸಿನಲ್ಲಿ ಕಾಮಕೇಳಿಯ ಬಗ್ಗೆ ಮಾಹಿತಿ ಒದಗಿಸುವುದು ಸಾಮಾನ್ಯ. ಮಕ್ಕಳು ಮನಸ್ಸನ್ನು ನಿಯಂತ್ರಿಸುವುದಕ್ಕೆ ಸಾಧ್ಯವಾಗದಿದ್ದರೂ ವಾತ್ಸಲ್ಯದ ವಾತಾವರಣದಲ್ಲಿ ಎಚ್ಚರಿಕೆ ಸಂದೇಶವನ್ನು ಕೊಡಲು ಸಾಧ್ಯವಿದೆ.
ವಿಶಾಲ ಮನೋಭಾವವಿರುವ ಪೋಷಕರೂ ಸಹ ತಮ್ಮ ಹದಿಹರೆಯದ ಮಕ್ಕಳ ಲೈಂಗಿಕ ಆಸಕ್ತಿ/ಕುತೂಹಲವನ್ನು ಉತ್ತೇಜಿಸುತ್ತಾರಾದರೂ ಎಚ್ಚರಿಕೆಯ ಮಾತುಗಳನ್ನು ಆಡುವಾಗ ಕಾಮಕೇಂದ್ರಿತ ವರ್ತನೆಗಳನ್ನು ಪ್ರಸ್ತಾಪ ಮಾಡುವುದಿಲ್ಲ. ಹೀಗಾಗಿ ಹದಿಹರೆಯದ ಮಕ್ಕಳು ಕಾಮ ಕಂಪನಗಳನ್ನು ಒತ್ತಡ, ಬಲಾತ್ಕಾರ ಪ್ರಯೋಗಗಳ ರೀತಿಯಲ್ಲಿಯೇ ತಿಳಿದುಕೊಳ್ಳುತ್ತಾರೆ. ಸಂಭೋಗದ ವಿಷಯಕ್ಕೆ ಬಂದಾಗಲಂತೂ ಹದಿಹರೆಯ ಮನಸ್ಸು ಯಾರ ಹಿಡಿತಕ್ಕೂ ಸಿಗದ ರೀತಿಯಲ್ಲಿ ಮುಂದುವರೆಯುತ್ತದೆ. ಇತರ ದೇಶಗಳಂತೆಯೇ ನಮ್ಮ ಹದಿಹರೆಯದ ಮಕ್ಕಳು ಲೈಂಗಿಕ ರೋಗಗಳಿಗೆ ತುತ್ತಾಗುತ್ತಿರುವುದು ಏರುತ್ತಲೇ ಇದೆ. ಹದಿಹರೆಯದ ಬಸಿರಿಗೂ ತಪ್ಪು ಸ್ವಭಾವ, ಕಲ್ಪನೆಗಳು ಕಾರಣವೆನ್ನುವುದನ್ನು ಮನೆಮಂದಿಗೆ ಅರಿವಾಗಬೇಕಿದೆ. ಇಂತಹದೊಂದು ಕಾಲಘಟ್ಟದಲ್ಲಿರುವ ನಾವುಗಳು ಲೈಂಗಿಕತೆಯ ತಿಳಿವಳಿಕೆಯನ್ನು ಹೇಗಾದರೂ ಪರಿಚಯಿಸುವುದೇ ಒಳ್ಳೆಯದು.
ಬೆಳೆದು ನಿಂತ ಮಕ್ಕಳ ಮನಸ್ಸನ್ನು ಬದಲಾಯಿಸುವ ಪ್ರಯತ್ನದೊಂದಿಗೆ ಲೈಂಗಿಕ ವಿಕಾಸ, ವಿಕೃತಿಗಳ ಕಡೆ ಜಾಗೃತಿ ಮೂಡಿಸುವ ಪರಿಣಾಮಕಾರಿ ಮಾರ್ಗ, ಕಲಿಕೆಯೇ ಆಗಿರುತ್ತದೆ. ಶಿಕ್ಷಣ ಪಡೆಯುವ ವಯೋವಾನದಲ್ಲಿ ಹಂತಹಂತವಾಗಿ ಇದನ್ನು ಪರಿಚಯಸುವುದರತ್ತ ಗಮನಹರಿಸುವುದು ಇಂದಿನ ಶಿಕ್ಷಣದ ಆದ್ಯತೆಗಳಲ್ಲಿ ಒಂದಾಗಬೇಕು. ಶಿಕ್ಷಣದ ಮೂಲಕವೇ ಮನೊವಿಕಾಸ ಸಾಧ್ಯವೆನ್ನುವುದು ಈಗಾಗಲೇ ತಿಳಿದಿರುವ ಸಂಗತಿ. ವ್ಯಕ್ತಿಯ ಮನಸ್ಸನ್ನು ಅಲ್ಲೋಲಕಲ್ಲೋಲಗೊಳಿಸಬಲ್ಲ ಈ ವಿಷಯವನ್ನು ಸಹ ಶಿಕ್ಷಣದ ತಂತ್ರಗಳು ನಿರ್ವಹಿಸಬಲ್ಲವು ಎನ್ನುವ ವಿಶ್ವಾಸ ಬೇಗ ಬಂದಷ್ಟು ಉತ್ತಮ.