ಪಾಕ್​ ಗಡಿಯಲ್ಲಿ ಸ್ಮಾರ್ಟ್​ ಬೇಲಿ ಉದ್ಘಾಟಿಸಿದ ರಾಜನಾಥ್​ ಸಿಂಗ್

ಜಮ್ಮು: ಪಾಕಿಸ್ತಾನಿ ಉಗ್ರರು ಹಾಗೂ ಯೋಧರಿಗೆ ಗಡಿಯಲ್ಲೇ ತಡೆಯೊಡ್ಡುವ ಉದ್ದೇಶದಿಂದ ನಿರ್ವಿುಸಲಾಗಿರುವ ‘ಸ್ಮಾರ್ಟ್ ಬೇಲಿ’ಯನ್ನು ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್ ಉದ್ಘಾಟಿಸಿದರು.

ಜಮ್ಮು ಸೆಕ್ಟರ್​ನ ಅಂತಾರಾಷ್ಟ್ರೀಯ ಗಡಿಯಲ್ಲಿ ಸಮಗ್ರ ಸಂಯೋಜಿತ ಗಡಿ ನಿರ್ವಹಣಾ ಯೋಜನೆ (ಸಿಐಬಿಎಂಎಸ್) ಎರಡು ಪ್ರಾಯೋಗಿಕ ಯೋಜನೆಯಡಿ ತಲಾ 5.5 ಕಿ.ಮೀ. ಉದ್ದದ ‘ಸ್ಮಾರ್ಟ್ ಬೇಲಿ’ ನಿರ್ವಿುಸಲಾಗಿದೆ. ಸೋಮವಾರ ಸ್ಮಾರ್ಟ್​ ಬೇಲಿಯನ್ನು ಉದ್ಘಾಟಿಸಿದ ನಂತರ ಮಾತನಾಡಿದ ಸಚಿವರು ಸ್ಮಾರ್ಟ್​ ಬೇಲಿಯನ್ನು ಅಳವಡಿಸಿದ ನಂತರ ಪಾಕಿಸ್ತಾನ ಗಡಿ ಮತ್ತಷ್ಟು ಸದೃಢವಾಗಲಿದೆ ಎಂಬ ನಂಬಿಕೆ ಇದೆ. ಪಾಕಿಸ್ತಾನ ಗಡಿಯುದ್ದಕ್ಕೂ ಸುಮಾರು 2026 ಕಿ.ಮೀ. ಉದ್ದದ ಸ್ಮಾರ್ಟ್​ ಬೇಲಿ ನಿರ್ಮಿಸಲಾಗುವುದು ಎಂದು ತಿಳಿಸಿದರು.

ಗಡಿ ಭದ್ರತೆಗೆ ಕೇಂದ್ರ ಸರ್ಕಾರ ಹೆಚ್ಚಿನ ಆದ್ಯತೆ ನೀಡುತ್ತದೆ. ಗಡಿಯಲ್ಲಿ ಮೂಲಸೌಕರ್ಯವನ್ನು ಅಭಿವೃದ್ಧಿಪಡಿಸಲು ಹೆಚ್ಚಿನ ಗಮನ ನೀಡಲಾಗಿದೆ. ಗಡಿ ಭಾಗದಲ್ಲಿ ಸುಮಾರು 600 ಕಿ.ಮೀ. ಉದ್ದದ ರಸ್ತೆ ನಿರ್ಮಿಸಲಾಗಿದೆ. ನೂರಾರು ಬಾರ್ಡರ್​ ಔಟ್​ ಪೋಸ್ಟ್​ಗಳನ್ನು ನಿರ್ಮಿಸಲಾಗಿದೆ ಎಂದು ತಿಳಿಸಿದರು.

ಏನಿದು ಸ್ಮಾರ್ಟ್​ ಬೇಲಿ?

ಸಮಗ್ರ ಸಂಯೋಜಿತ ಥರ್ಮಲ್ ಇಮೇಜಿಂಗ್, ಇನ್ಪ್ರಾ-ರೆಡ್ ಮತ್ತು ಲೇಸರ್ ಬೀಮ್​ಗಳ ಅಗೋಚರ ತಡೆಬೇಲಿ ಇದಾಗಿದ್ದು, ಈ ಬೇಲಿಯನ್ನು ಯಾವುದೇ ರೀತಿಯಲ್ಲಿ (ಜಲ, ವಾಯು, ಸುರಂಗ ಮಾರ್ಗ) ಉಲ್ಲಂಘಿಸಲು ಪ್ರಯತ್ನಿಸಿದ ಕೂಡಲೇ ಎಚ್ಚರಿಕೆ ಗಂಟೆ ಮೊಳಗುತ್ತದೆ. ಯೋಧರನ್ನು ನಿಯೋಜಿಸಲಾಗದಂತಹ ಕಠಿಣ ಭೌಗೋಳಿಕ ಸನ್ನಿವೇಶ, ಗಿರಿ, ಕಂದರ, ಕೂಡಿದ ಗಡಿ ಪ್ರದೇಶದಲ್ಲಿ ಈ ಬೇಲಿಯನ್ನು ಅಳವಡಿಸಬಹುದಾಗಿದೆ.

Friends, If you like this post,kindly comment below the post and do share your Response, (Thanks for Reading....)