ಕರ್ನಾಟಕದ ಎಂಎಲ್​ಎಗಳ ಆದಾಯ ಎಷ್ಟು ಗೊತ್ತಾ?

ದೇಶದ ಅತಿ ಶ್ರೀಮಂತ ಸಚಿವರ ಅಗ್ರ-10 ಪಟ್ಟಿಯಲ್ಲಿ ಕರ್ನಾಟಕದ ನಾಲ್ವರು ಸಚಿವರು ಸ್ಥಾನ ಪಡೆದಿದ್ದು ಈಗ ಹಳೇ ಸುದ್ದಿ. ಈಗಿನ ಸುದ್ದಿ ಏನೆಂದರೆ, ಕರ್ನಾಟಕದ ಶಾಸಕರು ದೇಶದಲ್ಲಿಯೇ ಅತ್ಯಂತ ಹೆಚ್ಚು ವಾರ್ಷಿಕ ಸರಾಸರಿ ಆದಾಯ ಹೊಂದಿದ್ದಾರೆ ಎಂದು ವರದಿಯೊಂದು ಹೇಳುತ್ತಿದೆ. ಇದರ ಪ್ರಕಾರ ಕರ್ನಾಟಕದ ಎಲ್ಲ ಶಾಸಕರ ವಾರ್ಷಿಕ ಸರಾಸರಿ ಆದಾಯ ಒಂದು ಕೋಟಿ ರೂಪಾಯಿಗಳಿಂತಲೂ ಹೆಚ್ಚು.
ಇದೇ ವೇಳೆ ದೇಶದ ಎಲ್ಲ ಶಾಸಕರ ವಾರ್ಷಿಕ ಸರಾಸರಿ ಆದಾಯ 24.59 ಲಕ್ಷ ರೂ.ಗಳಾಗಿವೆ ಎಂದು ವರದಿ ಹೇಳುತ್ತಿದೆ.
ಅಭ್ಯರ್ಥಿಗಳ ಹಿನ್ನೆಲೆ, ಕ್ಷೇತ್ರ ಸಮೀಕ್ಷೆ ಮುಂತಾದ ರಾಜಕಾರಣಕ್ಕೆ ಸಂಬಂಧಿಸಿದ ವಿಷಯಗಳ ಮೇಲೆ ಕಾಲಕಾಲಕ್ಕೆ ಸಮೀಕ್ಷೆ ನಡೆಸುವ ಎಡಿಆರ್​ (ಅಸೋಸಿಯೇಷನ್​ ಫಾರ್​ ಡೆಮಾಕ್ರಟಿಕ್​ ರಿಫಾರ್ಮ್​ ) ಶಾಸನ ಸಭೆಯ ಸದಸ್ಯರ ಆದಾಯದ ಮೇಲೆ ಈಗ ಅಧ್ಯಯನ ನಡೆಸಿದೆ. ಈ ಅಧ್ಯಯನದಲ್ಲಿ ಕರ್ನಾಟಕದ ಜನಪ್ರತಿನಿಧಿಗಳು ದೇಶದೆಲ್ಲಾ ಪ್ರತಿನಿಧಿಗಳಿಗಿಂತಲೂ ಹೆಚ್ಚಿನ ಆದಾಯ ಹೊಂದಿರುವುದು ಬಹಿರಂಗವಾಗಿದೆ. ರಾಜ್ಯದ 203 ಶಾಸಕರು ವಾರ್ಷಿಕ ಸರಾಸರಿ 111.4 ಲಕ್ಷ ಆದಾಯ ಹೊಂದಿದ್ದಾರೆ. ಕರ್ನಾಟಕದ ನಂತರ ಮಹಾರಾಷ್ಟ್ರದ ಶಾಸಕರಿದ್ದು, ಅವರ ವಾರ್ಷಿಕ ಆದಾಯ 43.5 ಲಕ್ಷ ರೂ.ಗಳಾಗಿವೆ.
ಇನ್ನೊಂದೆಡೆ ಆದಾಯದಲ್ಲಿಯೂ ಲಿಂಗ ಅಸಮಾನತೆ ಕಂಡು ಬಂದಿದ್ದು, ಮಹಿಳಾ ಶಾಸಕರಿಗಿಂತಲೂ ಪುರುಷ ಶಾಸಕರ ಆದಾಯವೇ ಹೆಚ್ಚು.
ಇನ್ನು ತಾವು ಅನಕ್ಷರಸ್ಥರು ಎಂದು ಘೋಷಿಸಿಕೊಂಡಿರುವ ಶಾಸಕರ ವಾರ್ಷಿಕ ಸರಾಸರಿ ಆದಾಯ 9.31 ಲಕ್ಷ ರೂ.ಗಳಾಗಿವೆ. ಅಲ್ಲದೆ, ಬಹುತೇಕ ದೇಶದ ಅರ್ಧದಷ್ಟು ಶಾಸಕರು ತಮ್ಮ ವೃತ್ತಿಯನ್ನು ವ್ಯಾಪಾರ ವ್ಯವಹಾರ ಮತ್ತು ಕೃಷಿ ಎಂದು ತಿಳಿಸಿದ್ದಾರೆ.
ಇನ್ನು ದೇಶದಲ್ಲಿಯೇ ಕಡಿಮೆ ಅದಾಯ ಹೊಂದಿರುವ ಶಾಸಕರನ್ನು ಛತ್ತೀಸ್​ಗಢ ಹೊಂದಿದೆ. ಇಲ್ಲಿನ ಶಾಸಕರ ವಾರ್ಷಿಕ ಸರಾಸರಿ ಆದಾಯ ಕೇವಲ 5.4 ಲಕ್ಷ ರೂ.ಗಳಾಗಿವೆ.
ದೇಶದ ಒಟ್ಟು 4,086 ಶಾಸಕರ ಪೈಕಿ 3,145 ಶಾಸಕರ ಆದಾಯದ ಮೇಲೆ ಎಡಿಆರ್​ ಅಧ್ಯಯನ ನಡೆಸಿದೆ. ಚುನಾವಣೆಗೂ ಮೊದಲು ಸಲ್ಲಿಸಿದ್ದ ಸಲ್ಲಿಸಿದ್ದ ಅಫಿಡವಿಟ್​ನಲ್ಲಿ ಉಲ್ಲೇಖಿಸಿರುವ ಮಾಹಿತಿ ಆಧಾರದಲ್ಲಿ ಈ ವರದಿ ಸಿದ್ಧವಾಗಿದ್ದು, ಅಧ್ಯಯನಕ್ಕೆ ಒಳಪಡದ 941 ಶಾಸಕರು ಅಫಿಡವಿಟ್​ನಲ್ಲಿ ತಮ್ಮ ಆದಾಯದ ಮಾಹಿತಿ ನೀಡಿಲ್ಲ ಎಂದು ಎಡಿಆರ್​ ತಿಳಿಸಿದೆ.
ಇದಕ್ಕೂ ಹಿಂದೆ 2016ರಲ್ಲಿ ದೇಶದ ಶ್ರೀಮಂತ ಸಚಿವರ ಪಟ್ಟಿ ತಯಾರಿಸಿದ್ದ ಎಡಿಆರ್​, ಟಾಪ್​-10 ರಲ್ಲಿ ಕರ್ನಾಟಕದ ನಾಲ್ವರು ಮಂತ್ರಿಗಳಿರುವುದಾಗಿ ತಿಳಿಸಿತ್ತು. ಅದರಲ್ಲಿ ಡಿ.ಕೆ ಶಿವಕುಮಾರ್​ ಅವರು ದೇಶದ ಎರಡನೇ ಅತಿ ಶ್ರೀಮಂತ ಸಚಿವ ಎಂದೂ ಹೇಳಿತ್ತು.
Friends, If you like this post,kindly comment below the post and do share your Response, (Thanks for Reading....)