ಸರ್ಜಿಕಲ್ ದಾಳಿ ಯೋಧ ಸಂದೀಪ್ ಸಿಂಗ್ ಉಗ್ರರ ದಾಳಿಗೆ ಹುತಾತ್ಮ

ಶ್ರೀನಗರ: ಜಮ್ಮು- ಕಾಶ್ಮೀರದ ತಂಗ್​ಧಾರ್ ಬಳಿಯ ಗಡಿ ನಿಯಂತ್ರಣ ರೇಖೆಯಲ್ಲಿ ಭಾರತದೊಳಗೆ ನುಸುಳಲು ಯತ್ನಿಸುತ್ತಿದ್ದ ಉಗ್ರರೊಂದಿಗೆ ನಡೆದ ಗುಂಡಿನ ಕಾಳಗದಲ್ಲಿ ಲ್ಯಾನ್ಸ್​ನಾಯಕ್ ಸಂದೀಪ್ ಸಿಂಗ್ ಹುತಾತ್ಮರಾಗಿದ್ದಾರೆ. 2016ರಲ್ಲಿ ಪಾಕ್ ನೆಲದಲ್ಲಿ ಭಾರತ ನಡೆಸಿದ್ದ ಸರ್ಜಿಕಲ್ ದಾಳಿಯಲ್ಲಿ ಇವರು ಪಾಲ್ಗೊಂಡಿದ್ದರು. ಸರ್ಜಿಕಲ್ ದಾಳಿಯ 2ನೇ ವರ್ಷಾಚರಣೆಗೆ ಕೆಲವೇ ದಿನಗಳು ಬಾಕಿ ಇರುವಾಗ ಸಂದೀಪ್ ಸಿಂಗ್ ಹುತಾತ್ಮರಾಗಿದ್ದಾರೆ.

ಮೂವರ ಹತ್ಯೆ: 4 ಪ್ಯಾರಾ ಕಮಾಂಡ್​ಗೆ ಸೇರಿದ ಲ್ಯಾನ್ಸ್​ನಾಯಕ್ ಸಂದೀಪ್ ಸಿಂಗ್ ತಮ್ಮ ತಂಡದೊಂದಿಗೆ ತಂಗ್​ಧಾರ್ ಪ್ರದೇಶದಲ್ಲಿ ಸೋಮವಾರ ರಾತ್ರಿ ಪಹರೆ ನಡೆಸುತ್ತಿದ್ದರು. ಈ ಸಂದರ್ಭದಲ್ಲಿ ಕೆಲ ವ್ಯಕ್ತಿಗಳು ಅನುಮಾನಾಸ್ಪದವಾಗಿ ಓಡಾಡುತ್ತಿರುವುದನ್ನು ಗಮನಿಸಿದರು. ತಕ್ಷಣವೇ ಅವರನ್ನು ಸುತ್ತುವರಿದು, ಗುಂಡಿನ ದಾಳಿ ಆರಂಭಿಸಿದರು. ಉಗ್ರರು ಹಾರಿಸಿದ ಗುಂಡು ತಲೆಯೊಳಗೆ ಹೊಕ್ಕರೂ, ಛಲಬಿಡದೆ ಹೋರಾಡಿದ ಸಂದೀಪ್ ಸಿಂಗ್, ಮೂವರು ಉಗ್ರರನ್ನು ಹತ್ಯೆ ಮಾಡಿ ಹುತಾತ್ಮರಾದರು. ಗುರುದಾಸ್​ಪುರದಲ್ಲಿ ಮಂಗಳವಾರ ಮಧ್ಯಾಹ್ನ ಅಂತ್ಯಸಂಸ್ಕಾರ ನೆರವೇರಿಸಲಾಯಿತು.

2007ರಲ್ಲಿ ಸೇನೆಗೆ ಸೇರ್ಪಡೆ: ಸಂದೀಪ್ ಸಿಂಗ್ ಪಂಜಾಬ್​ನ ಗುರುದಾಸ್​ಪುರ ಜಿಲ್ಲೆಯ ಕೋಟ್ಲಾ ಖುರ್ದ್ ಗ್ರಾಮದವರು. 2007ರಲ್ಲಿ ಸೇನಾಪಡೆಗೆ ಸೇರ್ಪಡೆಗೊಂಡಿದ್ದರು.

ಕುಪ್ವಾರದಲ್ಲಿ 5 ಉಗ್ರರ ಹತ್ಯೆ

ಜಮ್ಮು – ಕಾಶ್ಮೀರದ ಕುಪ್ವಾರ ಜಿಲ್ಲೆಯಲ್ಲಿ ಸೋಮವಾರದಿಂದ ನಡೆಯುತ್ತಿರುವ ಕಾರ್ಯಾಚರಣೆಯಲ್ಲಿ ಭಾರತೀಯ ಯೋಧರು ಐವರು ಉಗ್ರರನ್ನು ಹತ್ಯೆ ಮಾಡಿದ್ದಾರೆ. ಒಬ್ಬ ಯೋಧ ಹುತಾತ್ಮರಾಗಿದ್ದು, ಒಬ್ಬರು ಗಾಯ ಗೊಂಡಿದ್ದಾರೆ.

Telegram Link https://t.me/joinchat/AAAAAE9lq2X6z4BbgUUCnw Friends, If you like this post,kindly comment below the post and do share your Response, (Thanks for Reading....)